Як піша Радыё Свабодная Эўропа / Радыё Свабода, Дональд Трамп не ўдакладніў, якія эўрапейскія лідэры паедуць у ЗША. Таксама Трамп сказаў, што неўзабаве пагаворыць з прэзыдэнтам Расеі Ўладзімірам Пуціным і выказаў упэўненасьць, што яго намаганьні спыніць вайну будуць пасьпяховымі.
«Мы зьбіраемся гэта зрабіць — сытуацыю паміж Расеяй і Украінай — мы зьбіраемся гэта зрабіць. Я ўпэўнены, што мы гэта зробім», — сказаў Трамп журналістам пасьля вяртаньня ў Вашынгтон з Адкрытага чэмпіянату ЗША па тэнісе ў Нью-Ёрку.
Трамп зноў заявіў, што ён «вельмі расчараваны» Пуціным, і дадаў, што і ён, і першая лэдзі Мэланія Трамп «расчараваныя тым, што гэтая недарэчная вайна працягваецца», бо яго намаганьні пераканаць Расею і Ўкраіну пагадзіцца на перамовы аб спыненьні вайны цярпяць няўдачу. Раней ён паставіў ультыматумы і тэрміны, у тым ліку пагражаў далейшымі санкцыямі, калі Расея не заключыць мірнае пагадненьне.
Прэзыдэнт Эўрапейскай рады Антонію Кошта раней заявіў, што Эўрапейскі зьвяз накіруе дэлегацыю ў Вашынгтон для падрыхтоўкі новых сумесных санкцый супраць Расеі.
«Мы працуем са Злучанымі Штатамі і іншымі аднадумцамі, каб павялічыць ціск праз далейшыя прамыя і другасныя санкцыі», — заявіў Кошта на прэс-канфэрэнцыі ва Ўкраіне 5 верасьня.
Старшыня Эўракамісіі Урзуля фон дэр Ляен абвясьціла, што 19-ы пакет санкцый ЭЗ супраць Расеі з моманту паўнамаштабнага ўварваньня Масквы будзе прадстаўлены ў пачатку верасьня.
Камэнтары Трампа прагучалі на наступны дзень пасьля таго, як Расея 7 верасьня зноў маштабна атакавала Кіеў бесьпілётнікамі.
Прэзыдэнт Украіны Ўладзімір Зяленскі 6 верасьня адхіліў прапанову Пуціна паехаць у Маскву для мірных перамоваў і замест гэтага заклікаў яго прыехаць у Кіеў.
«Ён можа прыехаць у Кіеў, — сказаў Зяленскі ў інтэрвію ABC News. —Я не магу ехаць у Маскву, калі мая краіна штодня зазнае ракетных атак. Я не магу паехаць у сталіцу гэтага тэрарыста».
Украінскі прэзыдэнт дадаў, што прапанова Пуціна была накіраваная на тое, каб «адкласьці сустрэчу», і што расейскі лідэр «гуляе ў гульні са Злучанымі Штатамі». Раней Пуцін прымяншаў каштоўнасьць сустрэчы з украінскім прэзыдэнтам, але таксама выказаў меркаваньне, што ён будзе гатовы сустрэцца зь ім, але толькі на «роднай зямлі».
«Лепшае месца для гэтага — расейская сталіца, горад-герой Масква», — сказаў Пуцін падчас эканамічнага форуму ў партовым горадзе Ўладзівасток 5 верасьня.
Украінскія ўлады паведамілі пра відавочную зьмену тактыкі расейскіх войскаў паблізу стратэгічнага горада Пакроўск, за які вядуцца баі, у Данецкай вобласьці. Украінскі падразьдзел, адказны за Пакроўск, паведаміў, што сілы расейскіх марскіх пехацінцаў спрабуюць пранікнуць у горад у розных месцах невялікімі групамі, шукаючы ўкраінскія артылерыйскія аб’екты і апэратараў бесьпілётнікаў. Расейскія войскі, выкарыстоўваючы танкі і бранятэхніку, спрабуюць атачыць Пакроўск, рыхтуючыся да штурму горада, які да вайны меў каля 60 000 насельніцтва, але цяпер там у асноўным руіны.
«Паводле наяўнай інфармацыі, Расея плянуе разгарнуць свае войскі ў Данецкай вобласьці для так званага «рашучага прарыву», — напісаў украінскі падразьдзел у сацыяльных сетках.
За апошнія два тыдні Зяленскі папярэджваў, што Расея арганізуе сілы для маштабнага восеньскага наступу. Гэтыя заявы прагучалі, калі Пуцін зрабіў рэзкі сыгнал заходнім партнэрам Кіева, заявіўшы, што любыя іх войскі, разьмешчаныя ва Ўкраіне, стануць мішэньню Расеі. «Калі там зьявяцца якія-небудзь войскі, асабліва зараз, калі ідуць баі, мы мяркуем, што яны будуць законнымі цэлямі», — сказаў Пуцін.
Выступаючы ў Пэкіне, Пуцін заявіў, што Расея гатовая змагацца за дасягненьне ўсіх сваіх мэтаў, калі Ўкраіна не пагодзіцца на расейскія ўмовы. Ён таксама намякнуў, што гарантыі бясьпекі Захаду пасьля будучага мірнага пагадненьня ня будуць тычыцца раёнаў на ўсходзе Ўкраіны.
Вайна Расеі супраць Украіны
- А 5-й гадзіне раніцы 24 лютага 2022 году кіраўнік Расеі Ўладзімір Пуцін заявіў пра пачатак ваеннай апэрацыі супраць Украіны на Данбасе на просьбу груповак «ДНР» і «ЛНР». 21 лютага падчас тэлезвароту да расейцаў Пуцін назваў так званыя «ДНР» і «ЛНР» незалежнымі дзяржавамі ў межах вобласьцяў. 22 лютага Савет Фэдэрацыі ратыфікаваў гэтае рашэньне.
- Расейскія войскі атакавалі ў тым ліку з тэрыторыі Беларусі, выкарыстоўваючы лётнішчы, базы і дарогі. Прадстаўнікі рэжыму Лукашэнкі апраўдваюць вайну, яго праціўнікі лічаць тэрыторыю Беларусі акупаванай, многія заклікаюць да супраціву расейскім захопнікам. Насуперак заявам Пуціна пра атакі выключна на вайсковыя аб’екты, расейцы пачалі бамбіць школы, дзіцячыя садкі і жылыя кварталы ўкраінскіх гарадоў.
- 2 красавіка 2022 году, пасьля вызваленьня гораду Буча пад Кіевам, фотакарэспандэнты апублікавалі дзясяткі фатаздымкаў, на якіх відаць сотні нябожчыкаў, ахвяраў масавых забойстваў, учыненых расейскімі войскамі. Многія пахаваныя ў стыхійных брацкіх магілах. Вялікія разбурэньні прынесла расейская акупацыя і Барадзянцы.
- З 24 лютага Расея захапіла толькі адзін абласны цэнтар — Херсон. Горад быў акупаваны расейскімі войскамі ў першыя дні вайны фактычна без баёў. Расейскія войскі адступілі зь яго і з правабярэжнай часткі Херсонскай вобласьці ў лістападзе 2022 году. Увосень 2022 году ўкраінскія войскі правялі маштабны контранаступ, у выніку якога расейскія сілы пакінулі большасьць сваіх пазыцый і ў Харкаўскай вобласьці.
- Нягледзячы на першапачатковыя заявы Пуціна пра тое, што акупацыя ўкраінскіх тэрыторыяў не ўваходзіць у пляны ўварваньня, 30 верасьня 2022 году была абвешчана анэксія чатырох вобласьцяў Украіны (Данецкай, Запароскай, Луганскай і Херсонскай), у тым ліку і тэрыторыяў, якіх Расея не кантралявала.
- 21 верасьня 2022 году Пуцін заявіў пра мабілізацыю ў Расеі. Пасьля гэтай заявы тысячы расейцаў накіраваліся на памежныя пункты і пачалі выяжджаць у Грузію, Казахстан, Армэнію, Манголію, Фінляндыю і іншыя краіны. У самой Расеі праціўнікі вайны падпалілі некалькі вайсковых камісарыятаў.
- У 2023 годзе Лукашэнка і Пуцін заявілі пра разьмяшчэньне ў Беларусі расейскай ядзернай зброі. 13 чэрвеня Лукашэнка сказаў, што частка ядзернай зброі ўжо дастаўлена з РФ у Беларусь. 16 чэрвеня Пуцін таксама заявіў, што першыя ядзерныя зарады ўжо дастаўленыя на тэрыторыю Беларусі, а астатнюю частку перамесьцяць «да канца лета або да канца году».
- 3 верасьня ўкраінскі брыгадны генэрал Аляксандар Тарнаўскі заявіў, што Ўзброеныя сілы Ўкраіны прарвалі першую лінію абароны на запароскім кірунку, на якую расейцы выдаткавалі больш за ўсё рэсурсаў.
- У канцы 2023 і на пачатку 2024 расейцы працягвалі масавыя абстрэлы ўкраінскіх гарадоў: Дніпра, Кіева, Харкава, Адэсы і іншых месцаў. Дзясяткі людзей загінулі і атрымалі раненьні. Украінскі бок у адказ абстрэльваў расейскі Белгарад, некалькі чалавек загінулі. Узброеныя сілы дзьвюх краін рэгулярна атакуюць падкантрольныя процілегламу боку тэрыторыі бесьпілётнікамі.
- Агулам з пачатку 2024 году ўкраінскія дроны пашкодзілі 18 расейскіх НПЗ, што прывяло да скарачэньня вытворчасьці амаль на 14%. У сакавіку былі атакаваныя такія абʼекты, як Разанскі НПЗ карпарацыі «Роснефть» і завод «Лукойла» ў Кстове ў Ніжагародзкай вобласьці. Абодва ўваходзяць у топ-10 найбуйнейшых НПЗ Расеі і забясьпечваюць бэнзінам Маскву.
- 6 жніўня 2024 году Ўкраіна пачала апэрацыю ў Курскай вобласьці. 19 жніўня прэзыдэнт Украіны Ўладзімір Зяленскі заявіў, што пад кантролем Украіны ў ходзе апэрацыі Ўзброеных сілаў Украіны знаходзяцца 92 паселішчы Курскай вобласьці Расеі. Галоўнакамандуючы Ўзброенымі сіламі Ўкраіны Аляксандар Сырскі ўдакладніў, што такіх населеных пунктаў 82. Улады Ўкраіны заявілі пра стварэньне ваенных камэндатураў і арганізацыі перадачы «гуманітарнай дапамогі ў населеныя пункты, якія знаходзяцца пад кантролем Украіны». Экспэрты Інстытуту вывучэньня вайны, прааналізаваўшы заявы і відэаматэрыялы з геалякацыяй, выказалі думку, што Ўкраіна кантралюе ў Курскай вобласьці ня ўсю тэрыторыю ў заяўленых межах прасоўваньня.
- 16–18 жніўня ўкраінскія сілы падарвалі тры масты, якія мелі стратэгічнае значэньне для матэрыяльна-тэхнічнага забесьпячэньня групоўкі расейскіх войскаў ва Ўкраіне і вайсковай авіяцыі, якая базуецца ў Курскай вобласьці.
- 17 лістапада Джо Байдэн зьняў абмежаваньні на нанясеньне ўдараў амэрыканскай дальнабойнай зброяй па тэрыторыі Расеі.
- З прыходам да ўлады ў ЗША Дональда Трампа рэзка актывізавалася тэма магчымых мірных перамоваў. Прэзыдэнт ЗША абнавіў свае патрабаваньні да эўрапейскіх краінаў-сяброў NATO павялічваць выдаткі на абарону. Таксама палітык заявіў, што хоча, каб Украіна дала Злучаным Штатам кантроль за сваімі радовішчамі рэдказямельных выкапняў у абмен на фінансавую падтрымку яе ваенных дзеяньняў супраць Расеі.
- У ноч на 14 лютага Расея бесьпілётнікам атакавала Чарнобыльскую АЭС, на саркафагу над разбураным у 1986-м пры чарнобыльскай катастрофе энэргаблёку пачаўся пажар, які ня могуць патушыць некалькі дзён.
- 12 лютага 2025 Трамп пагутарыў па тэлефоне з Пуціным, і 18 лютага 2025 году ў Эр-Рыядзе (Саудаўская Арабія) пачалася двухбаковая сустрэча з удзелам дзяржаўнага сакратара ЗША Марка Рубіё і кіраўніка МЗС Расеі Сяргея Лаўрова. Украіна на перамовы не запрошаная. Перад гэтым у Мюнхэне (Нямеччына) і Парыжы (Францыя) адбыліся, адпаведна, канфэрэнцыя па бясьпецы і саміт вядучых краінаў ЭЗ, але на іх так і ня выпрацавалі пляну доўгатэрміновай падтрымкі Ўкраіны. Акрамя таго, Вугоршчына — сябра Эўразьвязу, NATO і пры гэтым ляяльная да Расеі — дыстанцыявалася ад абмеркаваньня далейшай вайсковай дапамогі Кіеву, абвінаваціўшы іншыя краіны ў падбухторваньні далейшай вайны.
- У красавіку высьветлілася, што мірныя перамовы пакуль ня маюць посьпеху, а тым часам Украіна заявіла, што ведае імёны 155 кітайскіх наймітаў, якія падпісалі кантракты з Расеяй і пайшлі на вайну. Афіцыйны Пэкін заявіў, што сваіх грамадзянаў на вайну не адпраўляў, а наадварот, раіў жыхарам краіны трымацца падалей ад абодвух бакоў.
- Дзяржаўны ўкраінскі праект «Хачу жыць», які выконвае Каардынацыйны штаб у пытаньнях абыходжаньня з ваеннапалоннымі, у красавіку 2025 году апублікаваў прозьвішчы 742 грамадзян Беларусі, якія з 2023 году ваююць супраць Украіны на баку Расеі, зь іх 96 ужо загінулі.
- 1 чэрвеня на Дзень расейскай авіяцыі Ўкраіна правяла маштабную апэрацыю «Павуціньне». Служба бясьпекі Ўкраіны зладзіла ўдары па авіябазах па ўсёй тэрыторыі Расеі, зьнішчыўшы дзясяткі расейскіх вайсковых самалётаў. Дакладна невядома, адкуль кіраваліся гэтыя дроны і ці выкарыстоўвалі яны штучны інтэлект для нацэльваньня на расейскія самалёты. Паводле ўкраінскага боку, дахі грузавікоў, дзе хаваліся дроны, адчынялі дыстанцыйна, каб дазволіць квадракоптэрам узьлятаць.
- Улетку 2025 году прэзыдэнт Злучаных Штатаў Дональд Трамп правёў шэраг сустрэчаў, у тым ліку з Уладзімірам Зяленскім і Ўладзімірам Пуціным. Дамовіцца пра мірнае пагадненьне ці прынамсі на асабістую сустрэчу прэзыдэнтаў Украіны і Расеі не атрымалася.
- У ноч на 7 верасьня расейскія войскі нанесьлі рэкордны ўдар па Ўкраіне — дзяржаву атакавалі 805 «Шахедаў» і дронаў-імітатараў. Загарэўся будынак ураду ў Кіеве.
- Незалежная праверка інфармацыі пра ваенныя дзеяньні, якую даюць афіцыйныя асобы розных бакоў, не заўсёды магчымая.
Форум