Як паведаміла выданьне Delfi.lt, асобу пакуль не высьветлілі. Раней арганізацыя Sienos grupė, якая дапамагае мігрантам, паведамляла аб трох грамадзянах Іраку, якія заблукалі ў лесе — двух знайшлі памежнікі, а трэці — зьнік.
Мясцовая паліцыя вядзе расьсьледаваньне, высьвятляе прычыны сьмерці і спрабуе вызначыць яго асобу. Мяркуюць, што гэта мігрант, які зайшоў у Літву з тэрыторыі Беларусі.
На такую вэрсію паказваюць рэчы, знойдзеныя разам з целам. Апроч таго, два тыдні таму ў раёне Марцынконісу памежнікі затрымалі грамадзян Ірану — жанчыну і мужчыну. Жанчына была ў цяжкім стане — яна некалькі дзён знаходзілася ў мясцовай лякарні, а потым яе перавезьлі ў Вільню, дзе абсьледавалі і выпісалі.
Памежнікі прынялі ў іх заявы з просьбай аб прытулку. Цяпер яны знаходзяцца ў інтэрнаце Агенцтва прыёму і інтэграцыі.
- Міграцыйны крызіс на мяжы Беларусі і краін ЭЗ працягваецца зь вясны 2021 году. Улады суседніх эўрапейскіх дзяржаваў лічаць яго «гібрыднай атакай», арганізаванай рэжымамі ў Менску і Маскве. Трэцяга кастрычніка 2024 году міністар унутраных справаў і адміністрацыі Польшчы Томаш Семоняк прызнаўся, што сытуацыя на мяжы зь Беларусьсю стала «адным з самых сур’ёзных крызісаў» для польскай дзяржавы і «велізарным выклікам» для яго самога.
- Рэагуючы на крызіс, Літва і Польшча збудавалі сьцяну на мяжы зь Беларусьсю. Урады спачатку Літвы, а потым Латвіі і Польшчы ўлетку 2021-га зрабілі істотна стражэйшым заканадаўства аб нелегальным перасячэньні дзяржаўнай мяжы, а таксама выслалі ў сумежныя зь Беларусьсю раёны падмацаваньне з вайсковых злучэньняў.
- Лукашэнку абвінавацілі ў спрыяньні нелегальнай міграцыі ў краіны ЭЗ. Зьявіўся шэраг відэадоказаў, што беларускія памежнікі ня толькі не спыняюць мігрантаў, але і актыўна дапамагаюць ім нелегальна перасякаць польскую мяжу.
- З пачатку 2025 году, паводле падлікаў «Позірку», Польшча спыніла прынамсі 4,6 тысячы спробаў незаконнага перасячэньня мяжы зь беларускай тэрыторыі, з пачатку красавіка — больш за 1,1 тысячы спробаў.
- За 2024 год Літва, Латвія і Польшча агулам спынілі 36,3 тысячы спробаў незаконнага пранікненьня мігрантаў зь беларускай тэрыторыі.
- У чэрвені 2024 году на польска-беларускай мяжы ў сувязі з узмацненьнем міграцыйнага ціску стварылі так званую буфэрную зону. Яна пачала дзейнічаць з 13 чэрвеня і была створаная на 90 дзён, пасьля тэрмін яе дзеяньня ня раз падаўжалі. Даўжыня буфэрнай зоны — 60,67 км, шырыня — ад 200 м да 2 км. На працягу 44 км буфэрная зона ахоплівае 200 м ад лініі дзяржаўнай мяжы. Заезд у буфэрную зону забаронены. Абмежаваньні на перамяшчэньне і знаходжаньне ўнутры буфэрнай зоны ўведзеныя ў 27 паселішчах Гайнаўскага і Беластоцкага паветаў Падляскага ваяводзтва, якое мяжуе зь Беларусьсю.
- З 1 жніўня 2024 году польская армія таксама праводзіць апэрацыю «Бясьпечнае Падляшша», у межах якой для дапамогі памежнікам, якія ахоўваюць мяжу зь Беларусьсю, накіравалі некалькі тысяч вайскоўцаў.
- У канцы сакавіка ўрад Польшчы абмежаваў права мігрантаў прасіць аб наданьні міжнароднай абароны на мяжы зь Беларусьсю.
Форум