«Мы адмянілі блякаваньне сацыяльных сетак. Цяпер яны працуюць», — сказаў міністар сувязі і інфармацыйных тэхналёгій Прытхві Субу Гурунга, паведаміла агенцтва Reuters.
Выданьне The Kathmandu Post піша, што нягледзячы на камэнданцкую гадзіну і адмену блякаваньня сацсетак, людзі 9 верасьня зноў выйшлі на вуліцы. Прэмʼер-міністар краіны Кхадга Прасада Шарма Олі на фоне пратэстаў падаў у адстаўку.
Сутычкі дэманстрантаў з паліцыяй. Катманду, 8 верасьня 2025
Пратэстоўцы падпалілі будынак парлямянту, а таксама разграмілі рэзыдэнцыю прэмʼера і дамы іншых высокапастаўленых чыноўнікаў. Раней некалькі верталётаў эвакуявалі з міністэрскага квартала чыноўнікаў, якія там знаходзіліся. Паводле India Today, міжнародны аэрапорт у Катманду зачынены, усе рэйсы адмененыя. Пратэстанты раней у сацыяльных сетках заклікалі сарваць яго працу з дапамогай дронаў, фэервэркаў і лазэрных прамянёў.
Падчас пратэстаў у Нэпале. 9 верасьня 2025
Масавыя пратэсты пачаліся пасьля блякаваньня сацыяльных сетак. Улады Нэпала патрабавалі, каб мясцовыя і замежныя анлайн-платформы афіцыйна зарэгістраваліся ў Мінсувязі ва ўстаноўлены тэрмін, аднак у выніку ні адзін з сэрвісаў не падаў заяўку на рэгістрацыю і ўлады заблякавалі доступ да іх.
Падчас пратэстаў у Нэпале. Катманду, 9 верасьня 2025