У Пакістане абвясьцілі пра 261 вакансію на працу ў Беларусі

Пра гэта піша інфармацыйнае агенцтва «Позірк».

Для працоўных з Пакістана, паводле дадзеных Бюро, даступная 261 вакансія ў Беларусі.

Прапановы аб працаўладкаваньні пачалі публікавацца на сайце нядаўна — з 25 жніўня, а будаўнічыя — 3 верасьня.

У прыватнасьці, кампанія B.M.R. International з 3 верасьня прапануе працу на будоўлі пяці зваршчыкам, дзесяці мулярам і бэтоншчыкам, а таксама 15 арматуршчыкам і цеслярам. На ўсіх пазыцыях аднолькавы заробак — 1800 беларускіх рублёў.

Кампанія American International, якая знаходзіцца ў Пэнджабе, абяцае заробак у памеры 500 долараў 200 работнікам, якія будуць займацца перапрацоўкай рыбы і морапрадуктаў у Берасьце.

Акрамя таго, кампанія з Лахора Group Abu Abdullah шукае яшчэ 6 працаўнікоў на заробак 500-600 даляраў. Мяркуючы па дадзеных на сайце, 19 адпаведных працаўнікоў ужо ўдалося знайсьці.

27 жніўня міністар унутраных справаў Пакістана Махсін Накві на сустрэчы ў Іслямабадзе з кіраўніком беларускага МУС Іванам Кубраковым заявіў аб намеры «прыкласьці ўсе намаганьні для накіраваньня ў Беларусь найлепшай рабочай сілы пасьля ўважлівай праверкі».

11 красавіка Аляксандр Лукашэнка па выніках сустрэчы ў Менску зь кіраўніком ураду Пакістану Шахбазам Шарыфам заявіў, што краіны дамовіліся выпрацаваць мэханізм прыезду ў Беларусь пакістанскіх працоўных мігрантаў. Паводле яго слоў, Беларусь гатова прыняць 100-150 тысячаў спэцыялістаў.

Гэтыя пляны выклікалі неадназначную рэакцыю ў грамадзтве, якая, у сваю чаргу, выклікала раздражненьне ў беларускіх уладаў.

Міністэрства ўнутраных спраў паведаміла аб выяўленьні «актыўных правакатараў, якія наўмысна спрабавалі напружваць абстаноўку ў краіне і маніпуляваць грамадзкай думкай, распаўсюджваючы інфармацыю аб уездзе ў Беларусь 150 тысячаў грамадзян Пакістану».

14 жніўня Лукашэнка ў віншаваньні прэм’ер-міністру Пакістану Шарыфу з Днём незалежнасьці нагадаў яму аб «накіраваньні пакістанскіх кваліфікаваных спэцыялістаў для працы ў Беларусь».