Польскі фонд: «Беларускія дзеці прыяжджаюць у горшым псыхалягічным стане, чым украінскія»

Пры пераезьдзе ў іншую краіну, з чым сутыкнуліся тысячы беларусаў, найбольш цярпяць дзеці. На думку псыхолягаў, цяжэй за ўсё даводзіцца падлеткам. І менавіта гэтай узроставай катэгорыі спрабуе перш за ўсё надаць дапамогу арганізацыя, якая дзейнічае ў Варшаве, — фонд Zachód Wschód Wsparcie («Захад Усход Падтрымка»), перадае «Польскае радыё».

Старшыня фонду Вольга Сьцяпанава адзначыла, што часта бацькі вырашаюць: падлетак — ужо дастаткова дарослы і сам можа даць рады цяжкасьцям. А якраз у падлеткавым узросьце дзецям вельмі патрэбная падтрымка, таму ў фондзе яны могуць прайсьці групавую тэрапію з псыхолягам — трэнінг сацыяльных навыкаў. Як паводзіцца ў грамадзтве, як супрацьстаяць цкаваньню, як завесьці сяброў.

Акрамя беларусаў і ўкраінцаў, у групах былі дзеці з Азэрбайджану, Грузіі.

Пры гэтым псыхалягічны стан беларускіх дзяцей часьцей за ўсё горшы за стан украінскіх. Вольга Сьцяпанава патлумачыла, што можа быць прычынай.

«Шчыра скажу, што нашыя дзеці зь Беларусі прыяжджаюць у цяжэйшым псыхалягічным стане, чым дзеці з Украіны. І мой псыхоляг тлумачыць, чаму. Бо ўкраінскія дзеці прынамсі разумеюць, чаму яны адтуль зьехалі, у іх ідзе вайна, гэта небясьпечна для іхнага жыцьця, здароўя.

Беларускія дзеці, якія прыехалі раптоўна, сарваўшыся з сваіх месцаў, не разумеюць, чаму яны выехалі. Большасьць нашых бацькоў проста зрываюць дзяцей, не заўсёды тлумачачы, а дзеці не заўсёды разумеюць, чаму яны зьяжджаюць. Таму ў нас групы зьмяшаныя — і ўкраінскія, і беларускія, але наш псыхоляг імкнецца асобна, індывідуальна абгаварыць такія вось складаныя сытуацыі і разумее, што ва ўкраінскіх дзяцей адна сытуацыя, у беларускіх — іншая».

У шэрагу дзяцей назіраюцца праблемы з вывучэньнем польскай мовы. Прычына ня ў здольнасьцях, а ў матывацыі.

«Украінскія дзеці не жадаюць вучыць, бо яны думаюць, што скончыцца вайна і яны вернуцца. Беларускія дзеці не жадаюць вучыць, бо не разумеюць, навошта. Яны не разумеюць, што яны прыехалі ў гэтую краіну і павінны вывучыць польскую мову. Усё роўна гэта дапаможа, нават калі вернуцца ў Беларусь, польская мова ніколі нікому не замінала, гэта яшчэ адна дадатковая мова ў запасе».