Кіраўнік Беларусі падчас свайго выступу 30 чэрвеня, прымеркаванага да Дня Незалежнасьці, закрануў тэму прыбыцьця ў Беларусь наймітаў ПВК «Вагнера».
Аляксандар Лукашэнка падкрэсьліў, што да тэмы наймітаў ён вяртаецца, каб супакоіць людзей: «Каб вы не перажывалі і не хваляваліся».
«Цяпер (не зь Беларусі) раздзьмулі і разьдзімаюць гэтую праблему ПВК „Вагнера“... Ды супакойцеся. Калі б можна было іх запрасіць сюды (за іх кошт), гэта для нашага войска добра. Гэта самыя падрыхтаваныя людзі. Кажуць: „Там вязьні“. Паслухайце, усе вайскоўцы, якія там былі асуджаныя, яны ўжо загінулі, на жаль. І яшчэ адзін нюанс, які яны ня хочуць тлумачыць: асуджаныя вызваляліся зь месцаў пазбаўленьня волі ў Расеі толькі для расейскага фронту. Ніводны чалавек за мяжу не выяжджае».
ГЛЯДЗІЦЕ ТАКСАМА: Пад Асіповічамі будуюць найбуйнейшы ў Беларусі намётавы лягер на 15 тысяч чалавек. Ці для «Вагнэра»? Спадарожнікавыя здымкіТаксама Лукашэнка заявіў, што яго папярэджвалі аб тым, што разьмяшчэньне ў Беларусі «вагнераўцаў» — гэта «дрэнная рэч, дрэнны сыгнал». Вал званкоў Лукашэнку паступіў «ад тых, хто нас не прызнае», але да парад ён не прыслухаўся і сваё рашэньне абгрунтаваў прынцыпам: «калі вы ня ведаеце што рабіць у той ці іншай сытуацыі, а вашы ворагі гвалтам крычаць — рабіце ўсё наадварот». «Калі яны крычаць, што ядзерная зброя гэта дрэнна — рабіце наадварот».
Паводле Лукашэнкі, «беларускія вайскоўцы былі б ня супраць, каб „вагнераўцы“ падзяліліся зь імі сваім досьведам».
«На жаль, у нас іх няма. А калі іх хлопцы-інструктары, як я казаў ужо ім, прыедуць і перададуць баявы вопыт нам, мы прымем гэты вопыт... Я не зббіраюся ваяваць. Але я амаль 30 гадоў рыхтуюся да гэтай вайны, таму мы жывем у мірны час. Вось такі несьвяточны мэсэдж. На ўсялякі выпадак. Каб вы не перажывалі і не хваляваліся».
Таксама сёньня Лукашэнка заявіў. што Беларусь мае намер прапанаваць суседнім краінам «плян добрасуседзтва і міру».
«Мы чарговы раз працягваем вам руку міралюбнасьці не таму, што спалохаліся вашых „палкоў“ і „харугваў“. Мэты іх нікчэмныя, пляны вар’яцкія».
Разам з тым, ён заклікаў Захад «не выпрабоўваць славянскае цярпеньне і свой лёс», бо «калі дзяржаўнасьць, незалежнасьць, тэрытарыяльная цэласнасьць, бясьпека нашых народаў апынуцца пад рэальнай пагрозай, мы, нават не разважаючы, адкажам адэкватна».
ГЛЯДЗІЦЕ ТАКСАМА: Лукашэнка пагражае атакай на цэнтры прыняцьця рашэньняў краінаў Захаду
«Цяпер стала модна казаць пра цэнтры прыняцьця рашэньняў. Дык вось, каардынаты гэтых цэнтраў нам да мілімэтра вядомыя. І пазаўчора яны дакладна і ясна вызначаныя і зацьверджаныя мною на вайсковых мапах», — сьцьвярджаў Лукашэнка.
«Ці ўсьведамляюць заходнія палітыкі, што яны ўласнымі рукамі кладуць галаву Эўропы на ядзерную гільяціну? Яны сурʼёзна думаюць, што абыдуцца малой ахвярай — Вільняй і Эўропай?» — пытаўся Лукашэнка.
Спроба ўзброенага мяцяжу ў Расеі. Асноўнае
- Увечары 23 чэрвеня кіраўнік ПВК «Вагнэр» Яўгеній Прыгожын заявіў, што міністэрства абароны РФ нанесла ракетныя ўдары па тылавых лягерах наймітаў і што «зло, якое нясе вайсковае кіраўніцтва краіны, будзе спынена».
- Міністэрства абароны Расеі назвала гэтыя словы «інфармацыйнай правакацыяй».
- Уначы Прыгожын паведаміў, што байцы «Вагнэра» ўвайшлі ў Расею з акупаваных раёнаў Ўкраіны.
- Раніцай 24 чэрвеня Прыгожын заявіў, што ПВК «Вагнэр» увайшла ў Растоў-на-Доне і ўзяла пад кантроль вайсковыя аб’екты Растова, у тым ліку аэрадром.
- Пазьней Прыгожын заявіў і пра ўзяцьце пад кантроль вайсковых абʼектаў у Варонежы.
- У Маскоўскай, Растоўскай і Варонескай вобласьцях РФ увялі надзвычайныя захады бясьпекі.
- У Расеі завялі крымінальную справу аб узброеным мяцяжы.
- Пуцін у ранішнім звароце заявіў, што «Расею мяцяжом спрабуюць штурхаць да паразы і капітуляцыі» і што «дзеяньні супраць мяцежнікаў будуць жорсткімі».
- Кіраўнік дэпартамэнту нацыянальнай бясьпекі ў складзе Аб’яднанага пераходнага кабінэту Валер Сахашчык у сувязі з падзеямі ў Расеі заклікаў беларусаў «выкарыстаць гістарычны шанец».
- Лідэрка дэмакратычных сілаў Беларусі Ціханоўская заклікала дыпляматаў і сілавікоў не выбіраць паміж Пуціным і Прыгожыным, а вайскоўцаў — выгнаць войскі Расеі зь Беларусі.
- Аб’яднаны пераходны кабінэт заявіў, што «дэнансуе палітычныя і ваенныя дамовы з Расеяй» і аб’яўляе аб выхадзе Беларусі з АДКБ, ЭАЭС і СНД.
- Полк Каліноўскага заклікаў грамадзянаў Беларусі рыхтавацца да «вызваленьня ад дыктатуры і акупацыі»
- Прэс-служба Аляксандра Лукашэнкі ўвечары 23 чэрвеня напісала, што той угаварыў заснавальніка ПВК «Вагнэр» Яўгенія Прыгожына спыніць прасоўваньне да Масквы.
- Пазьней Прыгожын заявіў аб завяршэньні марша і вяртаньні баевікоў у палявыя лягеры.
- Пазьней зьявілася навіна аб тым, што Прыгожын паедзе ў Беларусь, а крымінальную справу ў РФ супраць яго спыняць.
- 26 чэрвеня у Генпракуратуры Расеі паведамілі, што справу супраць Прыгожына не спынілі.
- 27 чэрвеня Аляксандар Лукашэнка пацьвердзіў прылёт у Беларусь кіраўніка ПВК «Вагнэр» Яўгенія Прыгожына. Найміты ПВК «Вагнэр», паводле Лукашэнкі, будуць працаваць у Беларусі інструктарамі, ім прапанавалі ў распараджэньне закінутую вайсковую частку.
- 2 ліпеня ПВК «Вагнэр» абвясьціла, што на месяц прыпыняе вэрбоўку ў свае шэрагі. Гэта патлумачылі часовым няўдзелам групоўкі ў вайне супраць Украіны і «пераездам у Рэспубліку Беларусь».
- У сярэдзіне ліпеня байцы ПВК сталі калёнамі прыбываць у лягер каля вёскі Цэль. Міністэрства абароны Беларусі абвясьціла пра сумесныя трэнаваньні на палігоне «Берасьцейскі».
- Былы лідэр прарасейскіх сэпаратыстаў на Данбасе Ігар Стралкоў-Гіркін у сваім тэлеграм-канале, спасылаючыся на аднаго з камандзіраў ПВК «Вагнэр», кіраўніка штабу з пазыўным «Маркс», паведаміў, што ў Беларусь прыбудзе да 10 тысяч байцоў «Вагнэру».
- Агулам у Беларусь прыехалі 12 калёнаў наймітаў. Там была і будаўнічая тэхніка.
- 23 жніўня, як паведаміла Расавіяцыя, Яўгеній Прыгожын загінуў у разьбітым самалёце пад Цьверру. Разам зь ім там быў адзін з камандзіраў ПВК «Вагнэр» Дзьмітрый Уткін.